【Now Sports】日本昨晚力挫德國，表現夠熱血，現場氣氛亦然。置身現場的香港球迷深感日本人的團隊精神，為亞洲足球感到驕傲。他又指日本球迷帶動全場氣氛，亦感染大家一起以身作則，自發性執拾垃圾。港人Ricky昨日親臨卡爾法國際球場，見證日本以2:1反勝德國，他接受sports.nom.com記者越洋訪問時，直言感受到日本球員與球迷都感染全場：「日本上半場俾人㩒住打，睇到德國進取，但日本守得好好。球員走動、追逼好快速，完全冇揸流攤同腳軟。我哋唔係日本人，但都感受到日本精神，為亞洲足球引以為傲。」

「尤其日本好進取熱血，現場啲日本fans嗌得好勁，未停過。我同德國球迷位置比較遠，但感覺佢哋冇日本球迷咁熱血。全場尤其係上半場有氣有力嘅時候，雖然輸個12碼落後緊，但都一直吶喊，帶動成場氣氛。」

他指出，球迷的熱情感染現場任何國籍人士：「現場有其他人玩人浪都好，都唔夠佢哋咁有感染力。慢慢有唔同國籍人士都行近佢哋，搞到附近通道堵塞晒。後尾日本追番再入波，氣氛俾佢哋炒熱。當我哋離開球場時，任何國籍見到我哋揸住支旗，都以為我哋係日本人，對我哋講『good game』、『good show』。到完場，球員都走埋嚟觀眾席前，感謝有嚟捧場嘅觀眾，成個氣氛同團隊精神都好感染人。」

各國媒體多年來一直讚賞日本球迷在場內主動執拾垃圾，Ricky更有深切體會：「我覺得呢啲個人基本責任都要做番，喺現場睇到，再加上之前有啲開幕儀式後有啲記者講過，所以自己不期然咁做，執起啲嘢。賽會開波前擺定啲藍色膠袋，可能俾人整啲波波用嚟打氣，更重要係等人完場後執嘢，大家以身作則，周邊有唔同國籍嘅人都跟住做，都係好事同一個好開始。人民質素真係好緊要。」