漫威自從《復仇者聯盟4:終局之戰》後，票房戰績每況愈下，近排嘅《蟻俠3》、《Marvel隊長2》成績強差人意，聲望大跌，為咗救亡頻頻流出幕後大執位嘅傳聞！
《雷神奇俠》3、4集導演Taika Waititi上Podcast節目 Smartless 受訪時，講明唔會執導第5集《雷神奇俠》，仲自爆當初接拍《雷神3》只係為咗搵奶粉錢，自己一啲都唔鍾意超級英雄類電影，又話細個直頭唔會睇雷神漫畫，睇18頁就頂唔順嗰隻。Taika Waititi仲認為雷神角色設定令人迷惘，不過漫威應該釜底抽薪先會搵佢執導，見等錢駛咪即管睇下自己有咩幫到手。
Taika Waititi為《雷神3》注入黑色喜劇元素，成功幫雷神翻生，第4集雖然口碑麻麻，依然入選外媒Deadline 2022年最賺錢爆谷電影第9位！片商同Waititi都賺咗，不過依家導演要撇清關係，講到明為錢先接拍，對雷神無Feel㗎！
據聞漫威想雷神行返正劇暗黑路線，有意換導演，唔排除Taika Waititi先下手為強，講分手先！不過漫威確實好頭痕，除咗雷神之外，仲未搞掂反派Kang the Conqueror。呢個角色早於《蟻俠3》登場，可惜飾演者Jonathan Majors因為家暴醜聞而被易角，暫未有新任人選。
至於重頭作《復仇者聯盟》第5集，將會由《尚氣》導演Destin Daniel Cretton及編劇Jeff Loveness掌舵，但日前証實編劇換人改由Michael Waldron負責。Michael可算係重要漫威大腦之一，Loki首季、《奇異博士2: 失控多元宇宙》皆出自佢手，加埋《復5》（Avengers： The Kang Dynasty）及《復6》（Avengers： Secret Wars），責任重大！