TVB嘅《萬千星輝頒獎典禮2023》今晚移師澳門舉行，今年頒獎禮取消咗「最受歡迎電視角色」獎項，但就加入由馬來西亞及內地大灣區觀眾投選嘅獎項，以及專門畀25歲以下藝人角逐嘅「最具潛質新人」獎。

眾多劇集當中，《新聞女王》獲得今屆頒獎禮最多嘅23項提名。而綜合傳媒報導及業界消息，收視同口碑有齊嘅《新聞女王》，贏得最佳劇集嘅呼聲十分高。而劇中女主角「Man姐」佘詩曼幾乎喺毫無對手下再奪視后，以及新設嘅大灣區最佳女主角獎。唯一稍為能夠同阿佘爭嘅，其實都係《新聞女王》嘅李施嬅，據知佢將會獲得大馬視后。

而最佳男主角方面，估計會係《新聞女王》嘅馬國明及《破毒強人》陳豪之爭。陳豪自2007年之後已經未拎過視帝，《破》劇中以沙聲演出甚為觀眾受落；而新婚嘅馬明多次提名視帝之後，終於喺2019年榮登寶座，《新聞女王》演工於心計嘅男主播，表現不輸阿佘，加上新婚得獎場面一定好睇。暫時消息指陳豪拎視帝贏面較大，馬明會得到大灣區最佳男主角獎。而喺馬來西亞甚受歡迎嘅陳展鵬就有機會奪得大馬視帝。不過早前曾被視為視帝黑馬嘅黃宗澤，有傳將會現身頒獎禮，似乎唔會空手而回，2個海外視帝獎項有機會由Bosco拎走。

最佳男女配角本來有傳都係《新聞女王》嘅鄧智堅同高海寧奪得，畢竟收視好之餘，二人表現亦實至名歸。但男配角獎方面，頒獎禮前突然跑出何廣沛(《破毒強人》）及林子善（《隱形戰隊》）2大黑馬。如果以TVB立場，上位中嘅何廣沛得獎似乎比較配合捧人部署。女配角就有傳傅嘉莉（《香港人在北京》）同樣有力爭獎，但面對續約冇耐嘅高Ling，籌碼就未必夠嘞。而傅嘉莉同樣有望喺飛躍進步女藝員脫穎而出，不過據知劉穎鏇同樣係大熱門。

本來屬意鼓勵新一代嘅「飛躍」獎，搞下搞下唔少出道10年以上嘅藝員先輪到有獎。今屆「飛躍男」2大熱門馬貫東同吳業坤入行超過十年，另一黑馬許文軒更加有17年資歷。三人之中，坤哥演出較少而且未夠深入，而以主持為主嘅許文軒表現受「工種」限制，多次獲提名「飛躍男」同男配角獎嘅馬貫東應該有望「起飛」。