藝人鄭伊健躋身「女人堆」接拍新片，打趣被嘈到「耳膜穿」。他讚新片甚具意義，談到主題「閃避」二字時，更直認自己遇到問題也曾試過選擇逃避，認為有時其實亦非壞事。
鄭伊健與周家怡率領一班後起之秀，包括鍾雪瑩、雲浩影及黃淑蔓等演出英皇新片《深宵閃避球》。伊健形容與一眾後生女相差幾代，但合作得相當愉快，尤其她們將自己的首本名曲《友情歲月》唱得琅琅上口，令他相當感動。
談到今次躋身「女人堆」，伊健笑說：「以前真係拍男人戲居多。今次同佢哋見面，起初個個都唔出聲，熟咗之後我就好擔心，因為耳膜都穿！（拍完戲仲有冇聯絡？）絕咗交啦！依家扮熟咋，哈哈！」黃淑蔓即踢爆：「我哋打過邊爐㗎，又話同我哋去主題樂園同燒烤？」又指開工時伊健經常「萬歲」，請食蛋糕及糖水。
想拍水上運動電影
堅持「一年一部（作品）」的伊健表示甫接觸《深》片劇本時，已覺得題材罕有且意義相當，故樂意接演。今次題材涉及閃避球，他坦言：「班小妹妹由零開始要受訓一個月，拍嘅時候要吊威吔同食波餅，好多都試過受輕傷，差啲毀容！（咁你呢？）我只係受訓咗兩日，同埋同正規球隊打咗場波。」
談到「閃避」一詞時，伊健覺得每個人在某種環境都總會試過「閃一閃」，可能亦非壞事。問到他「最難忘的閃避」，他即笑說：「咪避啲狗仔隊囉！」而若有機會再拍運動題材作品，他表示最想拍水上運動：「興趣嚟，咩年紀都可以試着去做，尋求突破自己。」至於周家怡則開心與一班後輩合作：「佢哋好年輕，我啲活力返晒嚟、後生晒。」
另外，伊健個唱門票前日開賣4小時已售罄，日前他率領梁釗峰、馮允謙、黃淑蔓和雲浩影錄製本周日的線上音樂會，更獲贈寫有「一生幸福」字樣的日本清酒，預祝他個唱成功。除了黃淑蔓和雲浩影自薦當個唱嘉賓外，馮允謙更說想寫歌給伊健。
