無綫女星林凱恩早前被傳扭計不續約，冇份拍處境劇，被派主持資訊節目。不過昨日她有份出席處境劇的宣傳活動，表示同時拍劇及主持資訊節目，感覺提早預習「大人的世界」，又指與公司合作愉快，續約有得傾！
昨日《愛．回家之開心速遞》演員在電視城舉行《萬聖變裝派對》，同時慶祝「大龍生」羅樂林今日生日，他獲「大小姐」林淑敏大力獻吻，臉上留下唇印，他即尷尬得面紅耳熱。
提到「Bonnie」林凱恩不續約傳聞，她笑言：「大家仲會喺電視見到我，暫時仲未消失，一路有拍其他嘢，係同時兼顧《流行都市》，我仍然會喺《愛．回家》。」她坦言一直跟公司傾續約，合作得很開心。提到她被調去主持資訊節目，不少網民戥她不值，她笑言：「Bonnie唔可以成日都係小朋友，或者做人個女，要感受吓大人世界。我相信自己喺資訊節目中，可以畀大家睇到我唔只局限做細路女，有多啲變化。」她認為與「葱頭」丘梓謙於《愛》劇的感情綫可以繼續發揮。
劉丹唔過問兒子感情
至於劉丹被問兒子劉愷威近日在北京與高挑美女手拖手散步，他表示從不過問兒子的感情事，但希望有人照顧兒子：「佢冇同我講，即係冇呢件事，以前就有講。」又指兒子有權識任何朋友，但強調對方一定要跟孫女「小糯米」啱Key：「睇見個仔開心，我就開心。」提到孫女現讀三年級，他大讚孫女成績不俗，近日鋼琴比賽還贏得亞軍，非常安慰。
