占士金馬倫2009年上映嘅傑作《阿凡達》，全球總收近30億美元，紀錄至今仍未有電影打破。續集《阿凡達：水之道》（《阿凡達2》）過去嘅周末喺北美開畫，大家都想知套戲嘅視效有幾勁之餘，更想知票房成績如何。

出品嘅迪士尼事前估計，《阿凡達2》北美開畫會收1.5-1.75億美元，結果係收1億3400萬，稍為低於預期。但係全球開畫條數就有4億3500萬，又比起預計嘅多喎。

《阿凡達2》喺無對手（邊有人想同佢撼呢又？）情況之下，開畫應該破晒紀錄，而家算係僅僅合格。但業界人士向外媒Deadline分析，北美呢個禮拜開始放寒假，根據以往情況，而家直到新年嘅周末，每日嘅票房收入都有平日周六咁多。另一個分析係，新片北美開畫嘅周五同周六票房會有落差，大片如《壯志凌雲︰獨行俠》爭成27％，而《阿凡達2》只係少咗16％，證明仲有唔少人等緊睇。再加上星期日係世界盃決賽，比賽嗰陣係北美地區上午至中午時間，都有可能影響到一家大細入場。

《阿凡達2》票房值得關注嘅原因係套戲可以喺中國內地上映。根據內地票房資料庫貓眼，《阿凡達2》上映4日已經收逾4億人民幣，亦係比起預計嘅數字7億人仔低一截。行內人認為，雖然內地好耐冇外語片上映，觀眾都餓西片已久，但係呢期防疫限制放寬，反而令民眾唔敢出街，自然影響到票房。不過貓眼預測《阿凡達2》喺內地收入會高達25億人民幣，加上今年早過年，相信《阿凡達2》可以喺內地做埋賀歲檔，到時條數更爆都唔定。

至於喺香港，《阿凡達2》上畫2日多啲就已經過千萬。雖然《阿凡達2》片長超過3個鐘，但係IMAX版嘅戲飛貴過其他，而唔少人都真係想睇IMAX感受下，再破1億大關應該唔難。