無綫歌唱選秀節目《聲夢傳奇2》圓滿落幕，唱功一流的「大魔王」趙紫諾（Sabrina）不敵人氣美少女任暟晴（Jasmine），賽後忍不住爆喊；至於獲勝的Jasmine，表示最緊要瞓番夠本！

《聲夢2》賽果前晚塵埃落定，賽前獲一致睇好的Sabrina大熱倒灶，屈居季軍，見她喊到眼腫腫，但否認是因為落敗而痛哭：「唔係！我係見到Vivian（江廷慧）先喊，因為參賽時佢對我好好，見到佢喊，我自己忍唔住先喊。」她滿意自己的表現，對於只得季軍亦沒有失望：「我做到自己想做嘅嘢，表現好好，對得住大家。（評判提到你啲廣東話？）係呀！我啲廣東話好差，一定要努力學好啲，廣東話好緊要嘅。」

Janees認演出失準

至於力壓Sabrina獲勝的Jasmine坦言：「感覺好唔真實，但我心存感激，整體嘅表現我係好滿意。」她承認比賽期間壓力大，影響睡眠質素，現時讀中五的她笑說：「好彩放假。（完騷後最想做乜？）瞓覺，之前瞓得唔好。」問到贏得10萬元獎金，有何打算？她說：「真係諗都冇諗過有筆錢喺度，唔會咁衝動去用。（你預咗輸？）我係冇諗過攞冠軍。」

亞軍黃洛妍（Janees）亦不感失望：「只係我令人哋失望而有啲失落。」她直認第2回合時不在狀態，發揮不夠穩定，好像仍未準備好就要出場：「今次係我人生裏面第2次演出失敗，希望係最後一次，唔好再有失準情形。」她坦言一直夢想做歌星，會繼續朝這個方向進發。

此外，《聲夢2》最高收視17.9點，116萬觀眾見證Jasmine登上冠軍寶座，較上一周競逐五強席位賽事，上升1.9點。《東張西望》繼續穩坐收視冠軍，最高收視25.5點，上升1.6點，而剛播完的《黯夜守護者》最高收視18.5點，有121萬觀眾，上升0.7點。