張敬軒在英皇新片豁出去，放下身段到屠宰場開工，更與豬屍及內臟「對峙」超過10小時，結果被濃烈屍味纏身，氣味更充斥睡房，久久未能散去！對於與「靈魂伴侶」王菀之闊別8年再結片緣，他們甫見面即互笠高帽。

張敬軒（軒仔）、王菀之（Ivana）、魏浚笙（Jeffrey）及洪嘉豪等，昨日齊集打鼓嶺出席英皇電影《超神經械劫案》開鏡拜神，老闆楊受成專程到場主持儀式，場面熱鬧。該場景是「村長」Ivana的大本營，演押運員的軒仔會深入虎穴尋找遺失的人及物品。

闊別8年再合作電影，軒仔與Ivana默契依舊，更互笠高帽。Ivana大讚軒仔演技變得成熟，如同大哥哥般帶領眾演員，軒仔則禮尚往來讚她新片票房報捷，如今已躍升為千萬票房「影后」，逗得Ivana笑咪咪。談到一身古怪打扮，Ivana表示全為配合劇情，又自爆平日在家中亦作如此打扮，故有意待煞科後揀幾套戲服帶回家作家居服，即被軒仔揶揄她又食又拎！

Jeffrey扮蠢有難度

軒仔又透露日前到屠宰場拍攝被擄走的戲份，與豬屍及豬內臟共處一室長達10多小時，苦不堪言：「第一次體會到唱歌係咁幸福，可以有冷氣。雖然嗰日冇中暑，但焗到成身好大陣味，第二日離開睡房一陣，再入番去時仲係好大陣豬屍味！（有冇話畀『遮遮』知？）我有畀啲相佢睇，佢竟然話好有趣！」提到曾預告會有裸跑戲份，軒仔指現時計劃有變，不用他上陣：「唔好影響市容！（操咗肌咪浪費咗？）我都冇時間操，不過就真係第一次拍動作戲，又有得開真槍，希望公司之後開警匪片時我有機會拍啦！」

至於Jeffrey與嘉豪飾演愚蠢的押運員，他們同聲表示現實生活中聰明得多，故演繹時有難度。談到開槍戲份，Jeffrey表示霰彈槍及手槍都有玩，嘉豪則只以手指當槍用，但非常享受拍攝時的槍聲：「因為人生未聽過真槍聲，拍戲可以做現實做唔到嘅嘢，所以好興奮。第時有爆破戲可以搵我，我可以入火場㗎，又可以演殺手！」