移居台灣嘅前英皇小花蔣雅文（Mandy），憑標緻美貌及清純形象，深得網民愛戴，更係唔少人心目中嘅「文青女神」。已經淡出娛樂圈嘅Mandy，不時喺社交網站上載照片與網民分享生活點滴，近日係佢41歲生日，佢上載多張自拍靚相，唔少網民都紛紛留言大讚佢凍齡有術，甚至比出道時更靚女及有氣質。

蔣雅文喺日前（25日）上載三張自拍照到IG，相中佢化上淡妝，留有一頭及肩短髮，穿上一件藍色吊帶背心，望落零老態，非常年青及有氣質。佢留言寫上：「藉此紀念一夜長大(?)#酒精使人美麗用2007年的ccd（離港前一年買的相機）拍攝2023的現在（居台十五年後）」。唔少網民都留言大讚佢保養得好好，例如「你的40同我見到的40很不一樣」、「妳到底還要漂亮多久？」、「我以為呢張係07年嘅相」、「明明仲keep得好好，個樣一啲都冇變過，究竟食開咩牌子防腐劑」、「港女天花板」、「還以為是03年的照片」、「依然是以前那個雅文啊」及「你18歲同依加有咩分別」等等。

蔣雅文曾經係英皇旗下歌手，並與鄭希怡（Yumiko）同埋劉思惠（Maggie）組成組合3T；並獲安排與李逸朗（Don）以情侶形象組成Don & Mandy，不過佢喺2008年毅然放下演藝事業，移居台灣生活，創立自家品牌生意及開設小店等等；14年尾下嫁台灣設計師朱經雄，惟2021年宣布結束7年婚姻。